講客日誌 20220715 禮拜五

昨晡日下晝愛下班之前，又聽講發生院內感染个事情。前日開刀个病人，入院該時个PCR結果係陰性，毋過昨晡日个檢驗結果嗄變做陽性，表示佢可能係戴院期間分人遰著个。這毋係莊下醫院頭一擺發生這種事情了，老胡試著感染管制官員為著預防上擺發生个事情再過發生所做个改變係無效个。假使佢兜正會繼續開會定，無法度遽遽做出有效个預防作為，這種事情定著會繼續發生。恁樣毋單淨會威脅醫護人員摎戴院病人个康健，還會影響在地人對醫院環境个信心，最尾就會減少醫院个收入，做事个人就會肚屎枵了。

講客日誌 20220713 禮拜三

今晡日去客串國際橋牌社系列影片”和平歸來” 个演出，所以打早七點零就出門咧。因為在報名該量時話著拍片个位所離屋下當近，自家駛車去較利便，所以就無選擇坐劇組準備个車咧。一直到愛拍片前一日認真google一下距離，駛車最少還愛四十五分，假使堵著上班時間个塞車會過加久，就可能會赴毋著咧。想到這位，老胡試著早知就去高鐵站集合坐車較輕鬆 ，顛倒較贏。

講客日誌20220708 禮拜五

日本前首相安倍晉三過身了。

今晡臨晝時節，佢在車頭演講助選个時間分人對後背開銃打著，黏時就無了心跳。雖然遽遽就分人送著醫院急救，毋過還係在下晝五點零過身了，正67歲定。毋單淨日本人，乜有當多台灣人對這件事情試著當悲傷，因為佢毋管在做首相个時節還係退休過後，對台灣都當好，也當煞猛推動日本摎台灣在經濟摎政治方面个合作，無論係舊年疫情爆發該量時黏時捐分台灣當多个疫苗，還係今年幾下擺牽線日本大買台灣分中國挑事禁止出口个農特產品，減少佢兜利用農產品當作對台灣政治鬥爭个武器，傷害台灣个農民摎經濟。

講客日誌 20220705 禮拜二

 酸豆除忒炒豬肉還做得做麼个？昨暗晡因為酸豆浸水毋罅久，忒鹹忒酸嗄食毋得，結果無人愛食正做得放冰箱。假使無麼个處理，背尾就會全部擲忒咧，老胡試著有兜打爽。上網google大家分享个料理方式，大體都係炒肉，伸个就係煮排骨湯、炊魚定定。大體整理網路頂个資訊過後，今晡日就來做實驗，看有辦法摎佢救轉來，順序仔看有其他个料理做得做無。

講客日誌20220701 禮拜五

今晡日打早天時當好，係上班个好日仔。愛駛車上交流道之前，竟然有警察在該擺攤，檢查司機有食酒駛車無。老胡心肝肚試著當生趣，在下半年个頭一日仰會恁煞猛，一打早就開始捉食酒。毋過，敢有人恁早就開始食酒，食忒還有閒駛車出門？

講客日誌20220630 禮拜四

今晡日上晝也係出大日頭个天時，外背也係當熱，閒閒囥在屋肚，盡吹冷氣盡看書正經係一件當幸福个事情。摎中文相比，老胡試著看英文確實還係較困難。中文書一日做得看兩本，英文書歸禮拜一本還看毋忒。無法度，該本書現下正有英文版做得看，只好定定讀囉。

講客日誌20220629 禮拜三

最近終於正式進入著典型个熱天天時，上晝日頭下晝雨。毋過，今晡日下晝个風池水毋單淨落大水定，還過起大風，發風落水像做風搓樣，正經當得人驚。大水落著暗晡頭正束，雖然講天時有較涼，毋過還當翕，運動起來汗還係用飆个。看起來總係愛歸身濕濕个，係雨係汗乜無爭差了。

客客日誌20220628 禮拜二

 

尞日愛做麼个？當然係看書囉！罕得恁有閒，遽遽摎買等吂看个書消化一下。今晡日看个係火星阿公个新書”我在地球的的奇異旅程”。假使你想看一儕當會講故事个人講自家个故事，這本書就係你愛尋个。佢毋單淨係一儕有故事个人，佢自家个人生就係一隻當精彩個故事，而且還在繼續寫等。

講客日誌20220627 禮拜一

毋知有幾久無按樣認真看頭擺講个所謂”課外書”了，就像愛摎頭擺因為讀課本正無閒看个好書做一擺補轉來樣，最近正䟘床就拿書來看。可能頭擺機緣吂到，也係社會經驗也較少，現下看等這兜經典好書，心肝肚確實較有感覺。今晡日看个係反烏托邦三部曲裡背个兩本，赫胥黎”美麗新世界” 摎歐威爾”一九八四”，其中第一本係頭一擺看，第二本係對高中過後過看一擺个。兩本書裡背描寫个”美好世界”雖然正看起來無共樣，毋過共樣當得人驚。其實經過恁多年，還做得像預言樣精準對照現下世界部分地區个現象，這種洞察確實當得人佩服。

講客日誌20220624 禮拜五

 昨暗晡去涼水攤買果汁个時節，老胡發現旁唇个桌頂多了幾下盤又靚又大隻个紅龍果，分佢想到自家老屋山頂種个果子，現下應該也差毋多愛熟了。既然因為疫情無法度轉去，加上頭家寫个價數乜盡合理，高不將就買幾下隻轉屋試吃看哪。係有好食，過帶轉分佢餔娘食，佢最好食這味緒了。

講客日誌20220623 禮拜四

今晡日上晝日頭當大，藍藍个天頂無半點雲。金色个日光灑落辦公室个地泥，毋過無法度摎現下醫院裡背个疫情帶來一絲絲光明。小鎮醫院个病房在戴院个確診病人還當多，還過護理師因為確診隔離而盡來盡少个雙重壓力下，伸个人力強強會佇毋著了。開刀房出門支援个人盡來盡多，帶轉來个消息也盡來盡緊張。像”頭下又有醫院裡背个人確診了，續下來摎佢有接觸个人集中做PCR，又捉著新遰著个人”。這種現象確實當得人驚，對現下戴院个普通病人來講尤其危險。

講客日誌20220618 禮拜六

昨晡下晝注忒第四劑武漢肺炎疫苗，也算收集滿現下做得注射个三種預防射 ( AZ (腺病毒)、Moderna (mRNA)、高端 (蛋白次單元) ) 了，老胡心裡試著有一滴滴仔完成任務个成就感。過忒一夜，雖然無像其他人樣有肚屎枵个副作用，毋過好彩乜無麼个無鬆爽，就像注第二劑AZ樣，當自然。

胡客八道─今晡日烏克蘭，韶早台灣，敢有影？

今晡日烏克蘭，韶早台灣，敢有影？

腔調：海陸腔

俄羅侵略烏克蘭，到今已經滿兩隻月了，毋單淨超過俄羅一開始宣布个七十二點鐘，乜超過所有人事先个預料。還記得戰爭正爆發該量時，有兜所謂”專家”在電視節目頂宣傳麼个”今日烏克蘭，韶早台灣”，警告台灣人假使無乖乖跪等聽中共个話，就會摎烏克蘭共樣分人打。毋過，敢正經係恁樣？

 

胡客八道─牽等阿姆注疫苗，正經有效又有孝

牽等阿姆注疫苗，正經有效又有孝

腔調：海陸腔

阿姆節會到了，有想好愛送親愛的阿姆麼个禮物無？對清明連假到今吂過一隻月，逐日个COVID-19確診人數就從兩百零儕快速增加到超過一萬儕。根據中央流行疫情指揮中心个評估，這波疫情還吂到最高峰，續下來幾下隻月个數字可能會過加嚇人。在這个時節，想愛渡等阿姆去逛百貨公司會驚分人遰著，想愛買快篩試劑送佢又愛七早八早去藥房排列，還可能排半天結果買無。毋知愛仰結煞正好？莫操煩。除忒上網尋康健食品之外，係講你个阿姆還吂注好三針預防射，還做得把握時間渡佢去注射。恁樣毋單淨盡有心，好處還當多。下背摎大家詳細紹介。

胡客八道─遶境愛細義，媽祖正會保庇

遶境愛細義，媽祖正會保庇

腔調：海陸腔

 

逐年四月个”瘋媽祖”開始了。毋管係大甲媽還係白沙屯媽，逐擺都餳著幾下十萬人共下參加。舊年因為疫情來停辦，所以今年个活動當然分人過加期待。毋過，對清明連假到今，疫情變著當嚴重，連續幾下日都有超過一千儕確診，Omicron 變種 ”一儕遰分十儕” ( R0值=10 ) 个傳染力正經毋係講笑个。另外，有人可能清明時節已經分人遰著，毋過到遶境該時正發病，這兜無定時炸彈乜當得人驚。驚个毋單淨係自家著病，最怕个係遰著屋下吂注防射个老人家摎細人仔。又想遶境又驚著傷，到底愛仰結煞正好？底下紹介分大家知。