日本前首相安倍晉三過身了。
今晡臨晝時節，佢在車頭演講助選个時間分人對後背開銃打著，黏時就無了心跳。雖然遽遽就分人送著醫院急救，毋過還係在下晝五點零過身了，正67歲定。毋單淨日本人，乜有當多台灣人對這件事情試著當悲傷，因為佢毋管在做首相个時節還係退休過後，對台灣都當好，也當煞猛推動日本摎台灣在經濟摎政治方面个合作，無論係舊年疫情爆發該量時黏時捐分台灣當多个疫苗，還係今年幾下擺牽線日本大買台灣分中國挑事禁止出口个農特產品，減少佢兜利用農產品當作對台灣政治鬥爭个武器，傷害台灣个農民摎經濟。
佢最有名个一句話，就係”台灣有事，就係日本有事”，精準表達台灣摎日本个關係，毋單淨係情感上个兄弟，還係國家安全个生命共同體。另外，在佢退休過後還繼續𢯭手台灣加入印太軍事聯盟，希望做得增加台灣抵抗中共个本錢。佢个死，就像台灣少忒一儕當好个老朋友，正經分人試著當傷心。希望佢在天頂做得繼續保庇台灣摎日本个關係做得繼續平安順序，也希望日本政府做得詳細調查這事件發生个原因，好預防未來共樣个事情再過發生。安倍晉三，台灣承蒙你。
