今晡日上晝也係出大日頭个天時，外背也係當熱，閒閒囥在屋肚，盡吹冷氣盡看書正經係一件當幸福个事情。摎中文相比，老胡試著看英文確實還係較困難。中文書一日做得看兩本，英文書歸禮拜一本還看毋忒。無法度，該本書現下正有英文版做得看，只好定定讀囉。
下晝頭，本旦試著會摎昨晡日共樣起大風落大水，結果落來个係日頭水。出門看等係當生趣，毋過落忒過後，天時無較涼爽，顛倒過較翕熱了。看來今年夏天个用電可能毋會少，台電過愛緊張了。
今日最大个國際新聞，應該就係NATO正式邀請瑞典摎芬蘭兩國加入了。本旦反對个土耳其改變立場，撿採佢有拿著麼个好處。顛倒係頭先威脅佢兜做無得加入NATO个俄羅，竟然無發閼，實在當生趣。普丁心肝肚到底按算麼个？大家繼續追落去囉！
