昨晡下晝注忒第四劑武漢肺炎疫苗，也算收集滿現下做得注射个三種預防射 ( AZ (腺病毒)、Moderna
(mRNA)、高端 (蛋白次單元) ) 了，老胡心裡試著有一滴滴仔完成任務个成就感。過忒一夜，雖然無像其他人樣有肚屎枵个副作用，毋過好彩乜無麼个無鬆爽，就像注第二劑AZ樣，當自然。
現下隨時都有可能堵著確診个人，無論係病人還係同事，故所老胡打早䟘床就開始拚掃，恁樣假使分人遰著，一儕人隔離个環境較淨俐，戴起來也會較自然。確定間房掃淨俐後，續下來就愛來看身體有淨俐無了。對連續兩隻禮拜日做PCR檢查 (因為堵著確診个人) 開始，逐擺放尞快篩个想法就會跳出來，因為恁樣正知續下來七日做得出門，還係愛自家關等來。”好啦，就當作練習快篩个技術，看會盡來盡舒適無”
老胡心想。陰性，歐耶，做得出門尞了！
