今晡日烏克蘭，韶早台灣，敢有影？
腔調：海陸腔
俄羅侵略烏克蘭，到今已經滿兩隻月了，毋單淨超過俄羅一開始宣布个七十二點鐘，乜超過所有人事先个預料。還記得戰爭正爆發該量時，有兜所謂”專家”在電視節目頂宣傳麼个”今日烏克蘭，韶早台灣”，警告台灣人假使無乖乖跪等聽中共个話，就會摎烏克蘭共樣分人打。毋過，敢正經係恁樣？
其實，烏克蘭毋識挑戰俄羅个國家安全，乜無㓾死俄羅个老百姓。顛倒个，係俄羅个普丁政府為著自家个政治利益，想出” 摎烏克蘭境內个新納粹分子滅忒” ，愛”分烏克蘭非軍事化” 等理由，強強派兵侵略烏克蘭。恁樣看來，對俄羅摎中共這兜獨裁國家來說，打人个理由都係領導人個人說个算，摎對方敢有恁樣做係無相干个，也無管理由有合理無，佢想愛打就打了。共樣个道理，中共毋會因為台灣乖乖跪等就放棄派兵入侵个機會。看這下佢兜疫情恁嚴重，還有閒逐日挑挑派飛行機來亂，有錢做緊來緊多隻飛彈就知。面對中共，毋好相信佢兜講麼个，愛看佢兜做麼个。
另外，在台灣摎中國中央有台灣海峽隔等，假使中共愛打台灣，會比俄羅打烏克蘭更加困難。毋單淨愛準備較多个戰船、飛彈、飛行機摎阿兵哥，還需要較久來做集中，這兜無正常个活動會提早分人發現甚至攻擊。還有，在歸隻台灣个海唇，滿哪仔都有紅毛泥做个粽仔角，愛登陸會非常困難，毋單淨會死當多人，最尾可能麼个都拿毋著。相比起來，利用傳播像”今日烏克蘭，韶早台灣”這兜假消息个認知戰，係一種較省錢、省力過有效个作戰方式。而且，在台灣裡背有兜政治人物還有生理人分中共吸收，甘願做敵人个傳聲筒，用自家个影響力𢯭手添亂，正經當惡質。毋過，資訊真假難判，大家到底愛仰般分別？
首先，愛研究正經專業个資料，正做得對形勢有正確个了解。係講你好讀書，做得先讀”阿共打來仰結煞”還有”中共攻台大解密”這兩本書。假使你較慣利用網路，做得追蹤”烏熊學院” 摎”沃草Wachout”等面書專頁个文章。續下來，做得摎中共宣傳部門像外交部、國台辦摎環球時報報導个內容相比，假使台灣个政治人物摎媒體講个觀點摎佢兜共樣，心肝肚就愛有警覺，可能係中共个”大外宣”。最尾，做得上網研究講話个人摎媒體个背景，摎中共官方有麼个關係？講這兜話對佢兜有麼个好處？佢兜敢有別國國籍還是居留權，在中共打來該時做得遽遽離開？係講有，就愛疑狐佢兜恁樣講敢有特別个目的。
愛記得，面對中共个認知戰，愛摎自家頭腦”注防射”，正毋會”人喊毋會聽，鬼牽戇戇行”。願榮耀分烏克蘭，也願天佑台灣！
華語翻譯
今日烏克蘭，明日台灣，真的嗎？
俄羅斯侵略烏克蘭，至今已經滿兩個月了，不只超過俄羅斯一開始宣布的七十二小時，也超過所有人事前的預料。還記得戰爭剛正爆發時，有些所謂”專家”在電視節目上宣傳什麼”今日烏克蘭，明日台灣”，警告台灣人如果不乖乖跪下聽中共的話，就會像摎烏克蘭一樣被打。不過，真的是這樣嗎？
其實，烏克蘭不曾挑戰俄羅斯的國家安全，也沒殺死俄羅的老百姓。相反的，是俄羅斯的普丁政府為了自己的个政治利益，想出”打倒烏克蘭境內的新納粹分子” ，要”讓烏克蘭非軍事化” 等理由，強行派兵侵略烏克蘭。如此看來，對俄羅斯及中共這些獨裁國家來說，打人的理由都是領導人個人說的算，跟對方是否有這樣做沒關係，也不管理由是否合理，他想要打就打了。同理，中共不會因為台灣乖乖跪下來等就放棄派兵入侵的機會。看現在他們疫情那麼嚴重，還有空每天故意派戰機來亂，有錢做越來越多的飛彈就知道。面對中共，別相信他們講了什麼，要看他們做了什麼。
另外，在台灣跟中國中間有台灣海峽隔著，假使中共要打台灣，會比俄羅斯打烏克蘭更加困難。不只要準備更多的戰艦、飛彈、飛機和士兵，還需要較長時間做集結，這些不正常的活動會提早被人發現甚至攻擊。還有，在整個台灣的海邊，到處都有水泥做的消波塊，要登陸會非常困難，不只會死非常多人，最後可能什麼都拿不到。相比起來，利用傳播像”今日烏克蘭，明日台灣”這些假消息的認知戰，是一種比較省錢、省力又有效的作戰方式。而且，台灣裡面有些政治人物還有商人被中共吸收，甘願做敵人的傳聲筒，用自己的影響力幫忙添亂，真的很惡質。不過，資訊真假難辨，大家到底要怎麼分？
首先，要研究真正專業的資料，才可以對形勢有正確的了解。如果你喜歡讀書，可以先讀”阿共打來怎麼辦”還有”中共攻台大解密”這兩本書。假使你習慣利用網路，可以追蹤”黑熊學院” 及”沃草Wachout”等臉書專頁的文章。接下來，可以跟中共宣傳部門像外交部、國台辦及環球時報報導的內容做比較，假使台灣的政治人物和媒體說的觀點跟他們一樣，心裡頭就要有警覺，可能是中共的”大外宣”。最後，可以上網研究說話的人及媒體的背景，與中共官方有什麼關係？講這些話對他們有什麼好處？他們是否有他國國籍或是居留權，在中共打來時可以趕快離開？如果有，就要懷疑他們這樣說是否有特別的目的。
要記得，面對中共的認知戰，要給自己頭腦”打預防針”，才不會”人叫沒在聽，鬼牽傻傻跟”。願榮耀歸烏克蘭，也願天佑台灣！
