昨晡日下晝愛下班之前，又聽講發生院內感染个事情。前日開刀个病人，入院該時个PCR結果係陰性，毋過昨晡日个檢驗結果嗄變做陽性，表示佢可能係戴院期間分人遰著个。這毋係莊下醫院頭一擺發生這種事情了，老胡試著感染管制官員為著預防上擺發生个事情再過發生所做个改變係無效个。假使佢兜正會繼續開會定，無法度遽遽做出有效个預防作為，這種事情定著會繼續發生。恁樣毋單淨會威脅醫護人員摎戴院病人个康健，還會影響在地人對醫院環境个信心，最尾就會減少醫院个收入，做事个人就會肚屎枵了。
在這人人自危个時節，大家為著保護自家摎屋下人，高不將愛時常自我快篩，漸漸變做像食飯洗身睡目樣个一種生活習慣。毋過，醫院外背个世界看起來像完全無疫情樣，暑假出門遶尞个大人細子，摎景點還有飯店注文著滿滿个，正經爭差當多。兩相對照，老胡試著當生趣。
