酸豆除忒炒豬肉還做得做麼个？昨暗晡因為酸豆浸水毋罅久，忒鹹忒酸嗄食毋得，結果無人愛食正做得放冰箱。假使無麼个處理，背尾就會全部擲忒咧，老胡試著有兜打爽。上網google大家分享个料理方式，大體都係炒肉，伸个就係煮排骨湯、炊魚定定。大體整理網路頂个資訊過後，今晡日就來做實驗，看有辦法摎佢救轉來，順序仔看有其他个料理做得做無。
一開始，先摎本成个酸豆炒肉過浸涼滾水一點鐘，分佢較淡兜，續下來就開始做試驗咧。背尾有三樣菜較成功，老胡試著還食得，所以放在這分大家參考。假使大家有自家个酸豆料理，也做得交流分老胡，增加煮食个功夫。
第一係酸豆煎卵。先摎浸過水个酸豆炒肉過炒較燥兜，摎罐頭个包黍共下放落打好个卵裡背攪勻開來。續下來个作法就摎普通煎卵共樣。其實，也做得想做菜脯絲煎卵，菜脯絲換做酸豆定。這樣菜食起來就會有略略仔酸、鹹、甜个味緒，正經好食。
第二係酸豆鵝肉湯。因為堵好屋肚有炊好个鵝肉，就試做看哪。先先摎浸過水个酸豆炒肉過炒較燥兜，續下來放滾水摎鵝肉，小火過煮半點鐘就做得咧。鵝肉毋會硬忒，湯裡背有鵝肉个甜味摎酸豆个酸摎鹹，食起來就像酸菜湯樣，當合味。另外，酸豆个酸味摎鹹味分煮落湯肚，味緒就摎普通个長豆仔共樣做得食咧。
第三係酸豆包黍魚仔糜。先摎浸過水个酸豆炒肉摎魚脯仔共下炒，等出香味个時節放滾水、罐頭个包黍摎冰箱肚伸个白飯，轉小火分佢兜略略滾，差毋多十分鐘就做得食咧。
下擺假使堵着忒鹹忒酸个酸豆炒肉，除忒擲忒之外，做得試看這兜”清冰箱料理”，毋單淨做得分酸豆有”重生” 个機會，也做得分生活多加變化摎趣味。
