最近終於正式進入著典型个熱天天時，上晝日頭下晝雨。毋過，今晡日下晝个風池水毋單淨落大水定，還過起大風，發風落水像做風搓樣，正經當得人驚。大水落著暗晡頭正束，雖然講天時有較涼，毋過還當翕，運動起來汗還係用飆个。看起來總係愛歸身濕濕个，係雨係汗乜無爭差了。
這下，國際間个兩件大事，就係G7在德國開高峰會，還有在西班牙討論敢愛邀請芬蘭摎瑞典加入NATO个問題。德國摎法國係G7也係NATO个主要國家，毋過現下佢兜个石油摎瓦斯大體還愛俄羅提供，會驚怕在經濟摎軍事方面得勢俄羅，所以對俄羅侵略烏克蘭到今，對烏克蘭个支持當有限，支援个手腳當慢，武器又少又舊，正經見笑。這敢會變做二十一世紀个”慕尼黑會議”，大家做得繼續追落去。
