遶境愛細義，媽祖正會保庇
腔調：海陸腔
逐年四月个”瘋媽祖”開始了。毋管係大甲媽還係白沙屯媽，逐擺都餳著幾下十萬人共下參加。舊年因為疫情來停辦，所以今年个活動當然分人過加期待。毋過，對清明連假到今，疫情變著當嚴重，連續幾下日都有超過一千儕確診，Omicron 變種 ”一儕遰分十儕” ( R0值=10 ) 个傳染力正經毋係講笑个。另外，有人可能清明時節已經分人遰著，毋過到遶境該時正發病，這兜無定時炸彈乜當得人驚。驚个毋單淨係自家著病，最怕个係遰著屋下吂注防射个老人家摎細人仔。又想遶境又驚著傷，到底愛仰結煞正好？底下紹介分大家知。
出門前：確定自家準備好了。愛記得，定著愛注過三劑預防射 ( 注忒超過兩隻禮拜過較好 )，還愛帶細黃卡去分工作人員檢查，正做得參加遶境。細罐酒精摎酒精面帕愛帶等，封嘴仔愛準備有罅，最好準備好自家个碗箸。還有，定著愛下載
“臺灣社交距離APP”紀錄自家个足跡。假使這下你有發燒、咳嗽、流濞、喉嗹痛个症頭，還系屋肚還有人吂注防射，最好毋使強強出門，摎屋下人共下看線上直播追媽祖較贏。恁樣毋單淨盡有心，還過輕可又安心。
遶境期間：愛記得四不四要：做毋得鑽轎底、做毋得搶轎、做毋得盡行盡食、做毋得群聚歇睏。愛輒常洗手、逐日愛換封嘴仔、愛維持社交距離、愛掃等實聯制。經過國小、幼兒園个時節毋好儘採落去，因為小朋友吂注防射較無保護力。路程當中假使有發燒、咳嗽、流濞、喉嗹痛个症頭，最好遽遽離開，無論愛轉屋下休息，做自我康健管理，還係去分醫生看都已好，毋好強強繼續行。自家平安順序，媽祖正會歡喜。
轉屋後：除忒愛遽遽摎膴身還有衫褲洗淨俐，在續下來十日裡背，愛做好自家个康健管理，盡量毋好去酒家、夜店等著病風險較高个位所，乜毋好儘採去國小、幼兒園摎養護中心。另外，乜毋好出門遶山花、吃酒摎打鬥敘。在這十日裡肚，盡量減少摎屋下吂注防射个人共下吃飯、打嘴鼓。假使你有發燒、咳嗽、流濞、喉嗹痛个症頭，就愛去便利商店也係買居家快篩試劑來做篩檢。係講結果係陽性，就愛帶等該試劑去醫院做PCR檢查了。愛記得，做毋得坐巴士、捷運等公共交通工具！另外，愛注意“臺灣社交距離APP”逐日个提醒通知。係說你分人通知係確診病例个密切接觸者，就愛根據規定做好隔離，自家戴一間有洗身間个間房，封嘴仔戴等，做毋得離開間房，乜做毋得摎屋下人接觸。想愛摎屋下人打嘴鼓，做得用LINE、Messenger等社交軟體，恁樣毋單淨做得聯絡感情，還做得較早分佢兜知你个身體有麼个問題。在隔離个十日裡背，係說快篩結果係陽性，還係有敨氣無順序、胸痛、嘴唇烏忒等症頭，定著愛遽遽聯絡119，喊救護車𢯭手送醫院。保護自家，也保護屋下人。遶境愛細義，媽祖正會保庇！
華語翻譯
遶境要小心，媽祖才會保庇
每年四月的”瘋媽祖”開始了。不管是大甲媽還是白沙屯媽，每年都吸引幾十萬人參加。去年因為疫情而停辦，所以今年的活動更加令人期待。不過，從清明連假到現在，疫情變得非常嚴重，連續好幾天都有超過一千人確診，Omicron變種”一傳十” (R0值=10)得傳染力果然不是開玩笑的。另外，有人可能清明時節已經被傳染了，不過到遶境時才發病，這些不確定炸彈也很讓人恐懼。令人害怕的不只是自己生病，最怕的是傳染給家中沒打過疫苗的老人家和小孩。又想遶境又怕受傷，到底該怎麼辦才好？接下來介紹給大家知曉。
出門前：確定自己準備好了。要記得，一定要打過三劑預防針 ( 打完滿兩個禮拜更好 )，還要帶小黃卡給工作人員檢查，才可以參加遶境。要帶小罐酒精和酒精濕巾，要準備足夠的口罩，最好能準備自己的餐具，還有一定要下載
“臺灣社交距離APP”。假使現在你有發燒、咳嗽、流鼻涕、喉嚨痛的症狀，還是家中還有人沒打預防針，最好不要勉強出門，和家人一同看線上直播追媽祖比較好。這樣不只很有心，且更輕鬆又安心。
遶境期間：要記得四不四要：不要鑽轎腳、不要搶轎、不要邊走邊吃、不要群聚休息。要常常洗手、每天要換口罩、要維持社交距離、要掃手機實聯制。經過國小、幼稚園時不要隨便進去，因為小朋友沒打疫苗比較沒抵抗力。路程當中假使有有發燒、咳嗽、流鼻涕、喉嚨痛的症狀，最好趕快離開，無論要回家休息，做自我康健管理，還是去給醫生看都很好，不要勉強繼續走。自己平安順利，媽祖才會歡喜。
回家後：除了要趕快把身體和衣褲洗乾淨，在接下來兩個禮拜中，要做好自我健康管理，盡量不要去酒店、夜店等高風險場所，也不要隨便跑去國小、幼稚園和養護中心。另外，也不要出門遊玩、吃喜酒和聚餐。在這十天裡面，盡量減少和家裡還沒打預防針的人一起吃飯、聊天。假使你有發燒、咳嗽、流鼻涕、喉嚨痛的症狀，就要去便利商店或藥房買居家快篩試劑來做篩檢。如果結果是陽性，就愛帶著那個試劑去醫院做PCR檢查了。要記得，不要坐巴士、捷運等公共交通工具！另外，要注意“臺灣社交距離APP”每天的提醒通知。如果你被通知是確診病例的密切接觸者，就要根據規定做好隔離，自家住一間有浴室的房間，戴好口罩，不能離開間房，也不能跟家人有接觸。想要跟家人聊天，可以用LINE、Messenger等社交軟體，這樣不但可以聯絡感情，還可以提早提醒他們你的身體有什麼問題。在隔離的十天裡面，若是快篩結果為陽性，還是呼吸不順、胸痛、嘴唇發黑等症狀，一定要趕快聯絡119，叫救護車協助送醫。保護自己，也保護家人。遶境要小心，媽祖才會保庇！
