今晡日去客串國際橋牌社系列影片”和平歸來” 个演出，所以打早七點零就出門咧。因為在報名該量時話著拍片个位所離屋下當近，自家駛車去較利便，所以就無選擇坐劇組準備个車咧。一直到愛拍片前一日認真google一下距離，駛車最少還愛四十五分，假使堵著上班時間个塞車會過加久，就可能會赴毋著咧。想到這位，老胡試著早知就去高鐵站集合坐車較輕鬆 ，顛倒較贏。
拍片个位所在彰濱秀傳醫院，劇組摎醫院个部分空間完全改成2003年SARS期間樣，毋單淨醫院个標誌，衛生教育个廣告單，甚至電腦、書櫃摎救護車都係該時代个，正經非常用心。今晡日大家拍个係病人屋下人在醫院外背抗議封院个場面。雖然毋係主要个角色，毋過頭一擺分攝影機放在面前拍正經有兜毋慣，大家動作摎講話加減會有兜無自然，所以拍了幾下擺正做得咧。無過，劇組對客串个”牌友”也正經當照顧，毋單淨有食有喝，拍片个時間還安排在最早摎最尾日頭較無恁烈个時間，大家較毋會熱著。另外，佢兜三不二時也會提醒大家愛多食水，還搬幾下箱个涼水分大家食，實在當感心。雖然講拍兩幕之間等待个時間當長，毋過該時就係其他臨時摎專業演員拍其他部分个時節。看等佢兜在當晝頭个日頭下，一到一到个重頭來過，一隻畫面就愛拍幾下擺，正經當辛苦。在有冷氣个看等佢兜恁煞猛，老胡心肝肚毋單淨佩服佢兜个專業，也試著好彩自己係客串个，正經愛食該頭路自家係食毋得个。
拍片結束時節，導演老汪送大家一儕一組”和平歸來”紀念封嘴仔摎一本”國際橋牌社2” 个小說，正經係有食又有拿。包尾，”國際橋牌社2” 个女主角─范宸菲突然出現，摎大家共下翕相，看著確實當歡喜。范宸菲本人比影片裡背瘦多咧，原來在電視頂看起來正經有膨脹个效果。
2003年SARS該量時老胡在台北讀書，逐日就在和平醫院對面下公車，過行路去學校，該醫院因為疫情封院分隔離線圍起來，裡背个人在窗門貼等”放𠊎出去” 个畫面，還係有印象个。這擺有機會參加客串，就係希望國際橋牌社做得重現該量時个真相，因為”歷史做得原諒，毋過做毋得擲忒”。
