尞日愛做麼个？當然係看書囉！罕得恁有閒，遽遽摎買等吂看个書消化一下。今晡日看个係火星阿公个新書”我在地球的的奇異旅程”。假使你想看一儕當會講故事个人講自家个故事，這本書就係你愛尋个。佢毋單淨係一儕有故事个人，佢自家个人生就係一隻當精彩個故事，而且還在繼續寫等。
書裡背有一句話，安到”如果每次，你都把限制當起跑點，有一天，就會走到你無法想像的遠方。”這句話毋單淨係講好聽个，佢自家正經係恁樣做，做得講佢个人生就係這句話。雖然佢个身體个限制恁明顯，毋過佢个心無分該限制䌈等，從小到大，對自家企起來、行路、騎歐多拜、駛車、一儕人旅行，到研究所畢業、寫書、跨到音樂界做行銷、做企業講師、出國開班上課、做線上課程，逐件事情對普通人來講都無簡單了，對佢來講當然過無容易。身體个無方便會對動作造成影響，毋過無法度限制一儕人對自家能力个培養、對自家所愛个事情个付出、對自家做事品質个要求、追求新个機會个勇氣。
講到這，老胡愛紹介自家个國中班導師，佢摎火星阿公共樣因為小兒麻痺所以行路較慢兜，毋過這完全無影響佢對教育品質个要求、敬業个態度摎對同學个關心。雖然講佢平常時上課當生趣，係講有學生無規矩，佢還係會當嚴格个處罰佢兜。到今，老胡還係十分感謝摎敬重佢个栽培。
