昨暗晡去涼水攤買果汁个時節，老胡發現旁唇个桌頂多了幾下盤又靚又大隻个紅龍果，分佢想到自家老屋山頂種个果子，現下應該也差毋多愛熟了。既然因為疫情無法度轉去，加上頭家寫个價數乜盡合理，高不將就買幾下隻轉屋試吃看哪。係有好食，過帶轉分佢餔娘食，佢最好食這味緒了。
現下莊下醫院裡肚，疫情還係當嚴重，逐日都有人從陰性變做陽性。雖然毋知敢係對陪病个屋下人傳落來个，毋過對戴院病人摎護理師遰著个風險就高加當多。一下仔減少恁多護理師，照顧个能量強強會休克了。下晝記者會公布全國新確診个數字比昨晡日較少，專責病房个空床也較多了。看起來係好消息啊，老胡心想，毋過毋知幾時會輪到這位？正想等，外背又開始打風池了…