今晡日打早天時當好，係上班个好日仔。愛駛車上交流道之前，竟然有警察在該擺攤，檢查司機有食酒駛車無。老胡心肝肚試著當生趣，在下半年个頭一日仰會恁煞猛，一打早就開始捉食酒。毋過，敢有人恁早就開始食酒，食忒還有閒駛車出門？
老胡像頭擺樣摎窗門拉下來，對檢驗器吹了口氣。續下來該機器竟然講話了，講”有測著酒精”。”奇怪了，”老胡心想，”敢係頭下食个麵包肚有放酒？”警察聽等機器个報告之後，問著：”你車裡背敢有酒精？””有啊！消毒用个，就放在正手片个凳仔頂””按仰你先摎車仔停在路唇，下車過驗一擺。”也當神奇，這擺機器就講毋酒精了。”莫怪有人食酒駛車分警察檢查个時節，在車肚滿哪仔噴等酒精想愛騙過機器，新聞報導个係正經有樣。”老胡心想。
庄下醫院个疫情看起來有較好兜了，可能上隻禮拜感染个護理人員隔離結束轉來了。聽講下隻禮拜開始，病房愛恢復正常人力了，新个手術規定也出來了。到時做得看哪兜醫生會強強鑽縫仔，拿其他人个康健做代價了。瘟疫，正經係看著人性最好个一隻鏡仔。
下班轉宿舍做快篩，已經變做逐禮拜固定个儀式了。隨等經驗越來越多，技術也越來越好。毋知哪久正做得練習著，做忒毋會打哈啾摎流目汁，到時定著愛好好鼓勵自家一下。
