毋知有幾久無按樣認真看頭擺講个所謂”課外書”了，就像愛摎頭擺因為讀課本正無閒看个好書做一擺補轉來樣，最近正䟘床就拿書來看。可能頭擺機緣吂到，也係社會經驗也較少，現下看等這兜經典好書，心肝肚確實較有感覺。今晡日看个係反烏托邦三部曲裡背个兩本，赫胥黎”美麗新世界” 摎歐威爾”一九八四”，其中第一本係頭一擺看，第二本係對高中過後過看一擺个。兩本書裡背描寫个”美好世界”雖然正看起來無共樣，毋過共樣當得人驚。其實經過恁多年，還做得像預言樣精準對照現下世界部分地區个現象，這種洞察確實當得人佩服。
在”美麗新世界”裡背，所謂个”人” 從上到下分做五等，佢兜个命運對胚胎開始就分人決定了，從智力、教育、信仰、生活方式都受到政府集中管理，麼个時間做麼个都分人完美控制，最尾逐階層做分人設定个頭路，最上等管理胚胎，最下等做苦力，人个一生就變做一條數學公式。在這社會，連幸福也分人簡化做政府固定分人食个索麻劑量。在這个世界，結婚、降細人仔摎畜細人仔、文化創作、自由个思考都無需要，一生人正做兩件事定，做事摎享樂。假使你有自家个想法，想做自家个創作，就會分人派到偏僻个小島去。像現下大家分阿姆降个普通人，在該量時顛倒變做像動物樣
( 書裡背安到”野人”)，集中在保留區肚分人欣賞。試想看哪，假使你係較低階層个人，既然一儕人對出世前到過身後都分人決定了，就一生人像動物樣做著重覆个事到死，連選擇个自由都無，也無法度靠自家个頭腦改變人生，因為連智力都分人決定了，所以也毋知人生有其他个可能。這種”無知个幸福”。另外，當人做得像零件樣大量複製生產，按照政府个需要做安排，恁樣製造个人係人還係人樣个機器？還有，係哪兜人做得決定社會愛仰般運作、全部人愛仰般生活、甚至歷史愛仰般書寫个？佢兜个權力係對哪位來个？當少數人做得控制所有人个人生，其實摎現下北韓就當相像了。
第二擺看”一九八四”，因為對歷史了解比後生時節較多，對書本肚个內容體會過較深。滿哪仔个監視攝影機摎收音麥克，永遠不停改寫个歷史，製造敵人做仇恨教育，子女對爺哀个告發，祕密警察个設計陷害，刑求逼著做偽證出賣朋友愛人，毋會結束个對外”戰爭”，還有銃死所有反對”老大哥”个人。細人時節看正知當得人驚，毋過還有兜內容看毋識，現下好彩有網路，做得了解有關現下中共政權个作為，正知書裡肚寫个世界毋係空想，因為上背寫个逐件事情都做得尋著可信个新聞相對照。雖然比書本設定个時間慢忒幾下十年，還係在中國成真了，想來正經當得人驚。雖然毋知未來敢會影響著自家，毋過想著恁樣个國家就在隔壁，確實會睡毋落覺。
